Bréf sent á alla foreldra nemenda við Flensborgarskólann vegna umræðu um aukinn vopnaburð ungs fólks og ofbeldismál

Kæru foreldrar

Bréf þetta er sent á alla foreldra nemenda skólans í þeirri viðleitni að bregðast við umræðu um aukinn vopnaburð og auknar áhyggjur af ofbeldi barna og ungmenna. Eins og allir vita þá hafa alvarleg atvik undanfarið ýtt undir þann ótta. Við þessu er mikilvægt að bregðast.

Flensborgarskólinn áréttar að vopnaburður á almannafæri er lögum samkvæmt bannaður. Ef nemandi verður uppvís að því að bera vopn í skólanum verður málið undantekningalaust tilkynnt til lögreglu, og eftir atvikum til barnaverndarþjónustu ef um nemanda yngri en 18 ára er að ræða, og haft verður samband við foreldra. Ofbeldismál sem upp koma innan skólans eða á viðburðum í hans nafni verða sett í viðeigandi ferli og unnin eftir viðbragðsáætlun þar um sem finna má á heimasíðu skólans, ásamt skólareglum, sem við hvetjum foreldra og nemendur til að kynna sér. Á heimasíðu skólans má einnig finna upplýsingahnapp um hvernig tilkynna skuli ofbeldismál, sjá hér.

Ákveðnir þættir eru verndandi gegn áhættuhegðun barna svo sem samvera foreldra og barna, að útivistartími sé virtur, fylgst sé með netnotkun þeirra, að börnum sé sýnd umhyggja og þeim séu sett skýr mörk og að foreldrar þekki vini barna sinna og foreldra þeirra. Jafnframt felst mikið forvarnargildi í þátttöku barna í skipulögðu íþrótta- og tómstundastarfi og mikilvægt er að foreldrar séu virkir þátttakendur í foreldrastarfi.

Mikilvægt er að foreldrar taki þátt í að bregðast við þessari þróun og geri allt sem í sínu valdi stendur til að koma í veg fyrir ofbeldi og vopnaburð. Flensborgarskólinn hvetur foreldra til að ræða við börnin sín um hvernig við sköpum í sameiningu öruggara samfélag, þ. á m. um að það sé ólöglegt að ganga um með vopn, hverjar afleiðingar ofbeldis geta verið og kynna fyrir þeim hvert þau geta leitað eftir stuðningi.

Þá er vakin athygli á því að nemendur og foreldrar geta leitað stuðnings og ráðgjafar innan skólans svo sem hjá Hámarkskennurum á fyrsta ári, nemendaþjónustu skólans og stjórnendum. Þá bendum við á hjálparsíma Rauða Krossins 1717 og netspjall á www.1717.is og á www.112.is.

Þá bendum við á að á öllum hvílir tilkynningarskylda til barnaverndar ef ástæða er til að ætla að barn verði fyrir ofbeldi eða annarri vanvirðandi háttsemi eða stofni heilsu sinni og þroska í alvarlega hættu.

Í sameiningu getum við stuðlað að öruggara samfélagi og aukinni farsæld. Við hvetjum ykkur til að hafa samband við skólann ef einhverjar spurningar vakna.

Virðingarfyllst,

Erla S. Ragnarsdóttir

skólameistari Flensborgarskólans